Kontext Index| 4206 | mit grôzen zühten er dô sprach 'ir sult gebieten über mich, wan swaz ir welt, daz tuon ich; und wizzet sicherlîche: |
| 4210 | waeren mîn älliu rîche, sô daz ich keiser waere, der êren ich enbaere ê ich verlieze iuwer gebot. ir sult ez lâzen âne spot |
| 4215 | daz ich iuch, vrouwe, minne, wand ir habt mîne sinne gevangen und daz herze mîn; diu müezen bî iu immer sîn mit triuwen biz an mînen tôt.' |
| 4220 | vür ir vüeze er sich bôt mit ûf gerahten henden. er sprach: 'sich muoz verenden mîn lîp nâch iuwern gnâden gar; dise reise die ich var |
| 4225 | dâ ich den lîp verliesen sol daz tuot mir herzenlîche wol, wand ez durch iuch geschehn muoz.' der mägde kuste er an den vuoz vor vreuden und ergap sich ir. |
| 4230 | er sprach 'vrouwe ditz ist mir diu meiste vreude diech ie gewan daz ich diu vreise sol bestân dâ mit man iuch erwerben mac; got lâze mich den selben tac |
| 4235 | geleben daz ich in bestê, swiez halt mir dar nâch ergê, der iuch des landes verstôzen hât!' 'got gebe iu helfe unde rât!' sprach diu maget wol getân. |
| 4240 | den rîter hiez si ûf stân und erzeicte mit den ougen vor ir muoter tougen daz er ir was alsam der lîp. des pflegent noch diu reinen wîp |
| 4245 | daz si in diu herze sehent, dar inne suochent unde spehent durch des mannes ougen, wan swaz daz herze tougen wider den vriunt valsches hât, |
| 4250 | daz ouge ez nimmer verlât ezn meldez mit dem blicke; ez wenket harte dicke an im ûf unde nider und zücket sich vil gâhes wider; |
| 4255 | ezn siht niht güetlîche dar, niwan daz ez neme war ob iht ze merken an im sî; dâ erkennet die valschen bî. als ich mich versinnen kan: |
| 4260 | swâ diu ougen ein ander an lange sehent âne wanc, daz dâ herze und [ir] gedanc mit triuwen zuo ein ander stât; swâ ab der blic sô schiere ergât, |
| 4265 | dâ enist niht ganzer triuwe bî, ezn kome alsô daz ez sî daz sîn diu liute werden gwar: sô lâze er sîn sehen gar, ern blicke dan underwîlen dar. |
| Kontext |
Index |