Das Zelt Lârîens

10837 ein gezelt daz was gehêret
dâ vrouwe Lârîe inne saz,
daz nie dehein gezelt baz
10840 von pfelle wart gezieret,
mit golde geparrieret.
dar ûffe stuont ein guldîn tier
von edelem gesteine fier.
dar obe vlouc ein liehter van;
10845 dâ was daz selbe tier an
mit vil lûterm golde
gebildet als si wolde.
von leder ein huot hienc dâ bî
der daz gezelt machet vrî
10850 des regens, sô der nider gôz.
gegen der sunnen stuont ez blôz.
vil grôziu rîcheit darunder was:
mit pfelle von Kaukasas
vil bette wârn gedecket wol;
10855 diu sâzen edeler vrouwen vol.
daz selbe gezelt was sô wît
daz ich waen deheinez sît
iemen wîter kunde gespehen.
man mohte dâ rîche vürsten sehen
10860 rîten wider unde vür,
iegelîch rîter nâch sîner kür,
dâ er sînen vriunt gesprach
und ouch die künigîn gesach;
dar nâch si riten wider în
10865 dâ iegelîcher solde sîn.
si hêten alle spîse genuoc.
Kontext Index